Talent me prent de rymer e de geste fere
D’une purveaunce qe purveu est en la terre;
Mieux valsit uncore que la chose fust à fere:
Si Dieu ne garde, je quy que sourdra guere.
Ce sunt les articles de trayllebastoun;
Salve le roi meismes, de Dieu eit maleysoun
Qe a de primes graunta tiel commissioun!
Quar en ascuns des pointz n’est mie resoun.
Sire, si je voderoi mon garsoun chastier
De une buffe ou de deus, pur ly amender,
Sur moi betera bille, e me frad atachier,
E avant qe isse de prisone raunsoun grant doner.
Quaraunte souz pernent pur ma raunsoun,
E le viscounte vint à son guerdoun,
Qu’il ne me mette en parfounde prisoun.
Ore agardez, seigneurs, est-ce resoun?
Pur ce me tendroi antre bois sur le jolyf umbray;
Là n’y a fauceté ne nulle male lay;—
En le bois de Belregard, où vole le jay,
E chaunte russinole touz jours santz delay.
Mès le male doseynes, dount Dieu n’eit jà pieté!
Parmi lur fauce bouches me ount enditée
De male robberies e autre mavestée,
Que je n’os entre mes amis estre receptée.
J’ai servi my sire le roy en pées e en guere,
En Flaundres, Escoce, en Gascoyne sa terre;
Mès ore ne me sai-je point chevisaunce fere;—
Tot mon temps ay mis en veyn pur tiel honme plere.
Si ces maveis jurours ne se vueillent amender,
Que je pus à mon pais chevalcher e aler,
Si je les pus ateindre la teste lur froi voler,
De touz lur manaces ne dorroi un dener.
Ly Martyn et ly Knoville sunt gent de pieté,
E prient pur les povres qu’il eyent sauveté;
Spigurnel e Belflour sunt gent de cruelté,
Si il fuissent en ma baylie ne serreynt retornée.
Je lur aprendroy le giw de traylebastoun,
E lur bruseroy l’eschyne e le cropoun,
Les bras e les jaunbes, ce serreit resoun,
La lange lur tondroy e la bouche ensoun.
Qy cestes choses primes comença,
Jà jour de sa vie amendé ne serra;
Je vus di pur veyr, trop graunt pecché en a,
Quar pur doute de prisone meint laroun serra
Ytel devendra leres que ne fust unque mès,
Que pur doute de prisone ne ose venir à pes;
Vivre covient avoir chescum jour adès;
Qy ceste chose comenca, yl emprist grant fes.
Bien devoient marchaunz e moygnes doner maliçoun
A tous iceux que ordinerent le traillebastoun;
Ne lur vaudra un ayle le roial proteccioun,
Que il ne rendrount les deners sauntz regerdoun.
Vus qy estes endité, je lou, venez à moy,
Al vert bois de Belregard, là n’y a nul ploy,
Forque beste savage e jolyf umbroy;
Car trop est dotouse la commune loy.
Si tu sachez de lettrure, e estes coroucé,
Devaunt les justices serrez appellée;
Uncore poez estre à prisone retornée,
En garde de le evesque, jesque seiez purgée,
E soffryr messayse e trop dure penaunce,
E par cas n’averez jamès delyveraunce.
Pur ce valt plus ou moi à bois demorer,
Q’en prisone le evesque fyerge gyser.
Trop est la penaunce e dure à soffrer;
Qy le mieux puet eslyre, fol est qe ne velt choyser.
Avant savoy poy de bien, ore su-je meins sage;
Ce me fount les male leis par mout grant outrage,
Qe n’os à la pes venyr entre mon lignage;
Les riches sunt à raunsoun, povres à escolage.
Fort serroit engager ce qe ne puet estre aquytée,
C’est la vie de honme que taunt est cher amée.
E je n’ay mye le chatel de estre rechatée;
Mès si je fusse en lur baundoun à mort serroi lyverée;
Uncore attendroy grace e orroi gent parler,
Tiels me dient le mal que me ne osent aprochier.
E volenters verroient mon corps ledenger;
Mès entre myl debles Dieu puet un honme sauver.
Cely me pust salver que est le fitz Marie;
Car je ne su coupable, endité su par envye;
Qy en cesti lu me mist, Dieu lur maldie!
Le siècle est si variant, fous est qe s’affye.
Si je sei compagnoun e sache de archerye,
Mon veisyn irra disaunt, “cesti est de compagnie,
De aler bercer à bois e fere autre folie;”
Que ore vueille vivre come pork merra sa vye.
Si je sache plus de ley qe ne sevent eux,
Yl dirrount, “cesti conspyratour comence de estre faus,”
E le heyre n’aprocheroy de x. lywes en d’eus;
De tous veysinages hony seient ceux.
Je pri tote bone gent qe pur moi vueillent prier,
Qe je pus à mon pais aler e chyvaucher;
Unqe ne fu homicide, certes à moun voler,
Ne mal robberes pur gent damager.
Cest rym fust fet al bois desouz un lorer,
Là chaunte merle, russinole, e cyre l’esperver;
Escrit estoit en parchemyn pur mout remenbrer,
E gitté en haut chemyn, qe um le dust trover.